Archive for the ‘செய்திவிமர்சனம்’ Category

அருவியா?……ஆ……

குளிக்கச்சென்ற 2 சாப்ட்வேர் இஞ்ஜினியர்கள் பலிசற்றுமுன்-ல் வந்த செய்தி.

kumbakkarai.jpg

வராத செய்திகள்

கும்பக்கரை அருவி பெரியகுளம் என்ற ஊருக்கு மிக அருகில் இருக்கிறது. சில திரைப்பட கேமராக்களில் இதன் சாரல் அடித்திருக்கிறது.

அருவிகள் எவ்வளவுக்கெவ்வளவு அழகானதோ அதே அளவில் ஆபத்தும் இருக்கிறது.

அருவிகளில் தண்ணீர் விழுந்து ஓடும் இடங்களில், மிகப்பெரிய பள்ளங்கள் இயற்கையாகவே இருக்கும்.

கும்பக்கரையில் தண்ணீர் பெருக்கெடுத்து ஓடும் காலங்களில் பாறை தான் இருக்கிறது என நீங்கள் தண்ணீரில் காலை வைத்தீர்களென்றால் அதள பாதாளத்திற்கு சென்று விடுவீர்கள்.

மேலே வர முயற்சிக்கையில் அருவி தண்ணீர் இன்னும் வேகமாக நீரின் போக்குக்கு ஏற்றவாறு கீழ் நோக்கி அழுத்தும்.

எப்பேர்ப்பட்ட நீச்சலர்களாக இருந்தாலும் மேலே வர முடியாது. மேலும், நீங்கள் உள்ளே போன பகுதி மிகக்குறுகியதாயிருக்கும்.. ஆனால் உள்ளே மிகப்பெரிய இடமாகவும், மேல் எழும்பி வர முயற்சிக்கையில் தலையில் பாறை தட்டி திரும்ப திரும்ப உள்ளே தான் போக வேண்டிவரும்.

இது போன்றதொரு பள்ளத்தை அளவிடும் போது கஜம் என்று குறிப்பிடுவார்கள். 2 யானை கஜம், 5 யானை கஜம் என்று சொல்லுவார்கள்.

mushrock.jpg

இந்தப்படத்திலிருக்கும் பாறை தண்ணீருக்குள் இருந்தால் எப்படி இருக்குமோ, அது போல பாறைகளின் அமைப்பு இருக்கும்.

எனவே கும்பக்கரை அருவிக்கு போகும் போது தண்ணீருக்குள் தெரியாமல் இறங்க வேண்டாம்.

நண்பர் செல்வேந்திரன் கொடிவேரி அருவியைப் பற்றி எழுதியிருந்தார். அதைப் படித்ததின் விளைவு தான் இப்பதிவு..

kodiveri.jpg

கொடிவேரி அருவி குற்றாலம் போல பெரிய அருவி கிடையாது. கரடுமுரடான இடத்தில் நின்று தான் அருவித்தண்ணீரில் தலைகாட்டமுடியும். ஆனால் பார்ப்பதற்கு மிகவும் ரம்மியமானதாக இருக்கும். படப்பிடிப்புகளுக்கு புகழ் பெற்ற கோபிசெட்டிபாளையம் என்ற ஊருக்கு அருகில் உள்ளது. இந்த அருவியும் சில படங்களில் தண்ணீர் காட்டியுள்ளது.

இந்த அருவியில் குளித்து உயிரழந்தவர்கள் நிறைய. சில மாதங்களுக்கு முன்பு ஆனந்த் என்ற இளைஞனும், அவரது நண்பரும் மிகக்கொடூரமான முறையில் இறந்திருக்கிறார்கள்.

ஆனந்த் அருவி தண்ணீர் ஓடுமிடத்தின் நடுவே உள்ள பாறையில் நின்று தலை துவட்டிக் கொண்டிருக்கும் போது, தண்ணீரில் இறங்கி குளித்துக் கொண்டிருந்த நண்பர் அலறும் சத்தம் கேட்டு, காப்பாற்றப் போய் அவரையும் தண்ணீர் உள்ளிழுத்துக் கொண்டது.

பின் இளைஞர்களின் பெற்றோர்கள் தங்கள் மகன்களின் உடல்களை தேடி எடுத்து தருமாறு அங்கிருக்கும் நீச்சல் அனுபவம் வாய்ந்தவர்களிடம் வேண்ட,

நீண்ட நேரத்தேடலுக்குப் பின் உடல் கண்டெடுக்கப்படுகிறது.

இதன் பின் உள்ள சதி என்னவென்றால், அந்த அருவியைச் சுற்றியிருக்கும் ஒரு சில கயவர்கள் தண்ணீரின் வேறு பகுதியில் இறங்கி தண்ணீருக்குள்ளேயே சென்று குளித்துக் கொண்டு இருப்பவர்களின் கால் பிடித்து உள்ளே இழுத்து செல்லப்பட்டு பாறை இடுக்குகளில் கட்டி வைக்கப்படுகின்றனர். அதனால் மூச்சு திணறி இறந்து விடுகின்றனர்.

ஆனந்த் தன் நண்பன் உள்ளே இழுத்து செல்லப்படுவதைப் பார்த்து விட்டதால் அவனையும் தண்ணீருக்குள் இழுத்துக் கொன்றார்கள்.

கரையில் இருந்து பார்த்தவர்களும் இதை உறுதிப்படுத்துகிறார்கள்.

தேடி வரும் பெற்றோர்களின் வசதியைப் பொறுத்து, பேரம் பேசி ஆயிரங்களோ, லட்சங்களோ வாங்கிய பிறகு உடல்களை எடுத்து தருகிறார்கள்.

எனவே இத்தகைய அருவிகளுக்கு போகும் போது மிகுந்த எச்சரிக்கையுடன் இருங்கள். அந்திசாயும் வரை அங்கு இருக்காதீர்கள்.

கோபி மற்றும் பெரியகுளம் பகுதியைச் சேர்ந்த நண்பர்கள் இது பற்றி உங்கள் கருத்துகளை எழுதலாமே?

்.

கனியா கனி்களும், கண்ணாடி கனவுகளும்

சற்றுமுன் குழு நடத்திய போட்டியில் இரண்டாம் பரிசு பெற்ற படைப்பு. பரிசுக்குரியதாக தேர்ந்தெடுத்த சற்றுமுன் குழுவுக்கு நன்றி!!!

ஒரு மணித்துளி கூட கால்கள் ஓய்வெடுக்காமல் நின்று கொண்டே நடுநிசி வரை வேலை செய்யும் சிறு கால்களின் வேதனை தெரியுமா?

துத்தம் கலந்த பசையில் நாள் முழுவதும் வேலை பார்த்து சுருங்கிப்போன விரல்களைப் பார்த்திருக்கிறீர்களா?

காலை முதல் மாலை வரை கைகளில் வெடி மருந்தோடு வேலை செய்கிற பிஞ்சுக்கைகளைப் பார்த்திருக்கிறீர்களா?

சாப்பிடும் போது கூட புகையிலை நெடி இரைப்பை வரை வருவதை உணர்ந்திருக்கிறீர்களா?

தன்னுடன் பணிபுரிபவனின் ஏச்சு, பேச்சுக்களையும், சில சமயம் சிற்சில அத்து மீறிய தொடல்களையும் சகித்துக் கொண்டு வேலை செய்யும் சின்னஞ்சிறிய சகோதரியின் மனோநிலை தெரியுமா?

திருப்பூரில், சிவகாசியில், நாகர்கோவிலில் இன்னும் பல ஊர்களின் தினசரிகளில் அடிக்கடி காணப்படும் வார்த்தைகள்

அதிகாரிகள் சோதனை, குழந்தை தொழிலாளர்கள் மீட்பு

செய்தித்தாள்களின் பக்கம்

தினமும் அதிகாலை எழுந்து சமையலில் அம்மாவுக்கு உதவி, மதிய உணவுக்கான தூக்கு போசியுடன் கிளம்பி, நெரிசலான பேருந்து பயணத்திலிருந்து உதிர்ந்து, வேகவேகமாக ஓடி பனியன் கம்பெனிக்குள் நுழையும் போதே தாமதத்திட்டு வாங்கித்தான் அன்றைய பணி ஆரம்பமாகிறது சின்ன சகோதரிக்கு!

பக்கத்து பக்கத்து மிஷின்களில் தைத்துக் கொண்டிருக்கும் டெய்லர்கள் பேசும் வார்த்தைகளும், சைகைகளும் புரிந்தும் புரியாமலும் இருக்கும்.

லேபர் ஆபிசருக்குப் பயந்து கேசியர் போட்டுட்டு வரச்சொன்ன சுடிதார் வேறு அக்கா அளவிற்கு இருப்பதால் அவ்வப்போது தொந்தரவு கொடுக்கும்.

அப்பா,அம்மா,அக்கா சம்பளம் போதாதுன்னு, அப்பா என்னையும் ஏழாப்பு் பரீச்சை முடிஞ்சதுமே வேலைக்குப்போன்னு சொல்லிட்டார். அக்காவுக்கு கல்யாணம் பண்ணனும்னா காசு வேணுமாம்!

பள்ளிகூடம் போனுமின்னா பாவாடை சட்டை போட்டுட்டுப் போலாம்.

மொத வார சம்பளம் வாங்கும்போதே இனிமே சுடிதார் போட்டுட்டு வந்தா வா, இல்லைன்னா வேலைக்கு வரவேண்டாம்னு கேஷியர் சொல்லிட்டார்.

இந்த வாரம் சனிக்கிழமை சம்பளம் வாங்கியாவது, புசுபா தியேட்டர் பக்கத்துல நல்ல சுடிதாரும், நாகலட்சுமி டெய்லர் போட்டிருக்க மாதிரி கம்மலும் அம்மாட்ட சொல்லி வாங்க வேண்டும். இந்த வாரச்செலவுக்கு பத்தாதுன்னு அம்மா புலம்புவா.

பாத்ரூம் போம்போதுவெள்ளிங்கிரிஆகாவழி நாய் வேற சுடிதார் மேலே நூல் இருக்குது பர்வதம்!ன்னு தொடுறான். அம்மாட்ட சொல்லலாமா? வேண்டாமான்னு தெரியலை.

புளியம்பழம் மரத்திலிருந்து உலுக்கும் போது சிறுவர்கள்ஒதப்பழம்என்ற ஒரு வகையை மட்டும் தேடி எடுத்து சாப்பிடுவார்கள்.

ஒதப்பழம் என்பது காயாகவும் இல்லாமல், பழமாகவும் மல் இருக்கும் ஒரு புளிப்பும், இனிப்பும் கலந்த சுவையுடன் இருக்கும்.

அந்த ஒதப்பழம் போன்றவர்கள் இந்த சிறுமிகள். கனியா கனிகள்.

முகத்துக்கு சிறிதும் ஒப்பாத முகப்பூச்சுடனும், தன்னுடன் வேலை செய்யும் மற்றவர்களைப் பார்த்து, அதைப்போலவே உடை உடுத்தி, செயற்கையான சிரிப்பு சிரித்து, வெட்கம் என்றால் என்னவென்று தெரியாது வெட்கப்பட்டு, தங்களை கனியாக காட்டிக்கொள்ளும் இவர்கள் கனியாக் கன்னிகள்.

child-labour2.jpg

கன்னிகள் போன்றே தங்களை கற்பனை செய்து கொள்வதும், ஆடை அலங்கரித்துக் கொள்வதும், சிங்காரித்துக் கொள்வதுமென கண்ணாடி முன் மட்டுமே இவர்களது கனவுகள்.

நமக்காவது இந்த வேதனைகள் ஓரளவுக்குப் புரியும். ஆனால் சில நூறுகளுக்கு ஆசைப்பட்டு ஈனப்பிழைப்பு நடத்தும் அரசு அதிகாரிகளுக்கும், ஏன் அரசாங்கத்துக்குக் கூட புரியவில்லை.

இப்போது, வெளிநாட்டில் இருந்து ஆயத்த ஆடைகளுக்கான ஒப்பந்தங்கள் அளிக்கும் போதே, சில மட்டும் குழந்தை தொழிலாளர்கள் இல்லாத தொழிற்சாலைகளைத் தேர்ந்தெடுக்கின்றன.

ஆனால் அதே சமயம், பனியன் சார்ந்த தொழில்களில் குழந்தை தொழிலாளர்களே இருக்கிறார்கள்.

இதுவரை எந்த அரசியல் தலைவராவது, அரசாங்கமாவது இதற்கு ஒரு தீவிர நடவடிக்கையோ, முழுமையாக தடுக்க ஒரு கடுமையான தடைச்சட்டமோ இது வரை கொண்டு வரவில்லை.

பெயரளவிற்கு மட்டுமே இவர்களை வைத்து வேலை வாங்கும் தொழிற்சாலை மீது நடவடிக்கை.

குழந்தை தொழிலாளர்களை மீட்ட பின்பு அவர்களின் கல்வி மற்றும் இதர செலவுகளை அரசே ஏற்க வேண்டும் அல்லது அந்த செலவை ஈடுகட்டும் வகையில் அந்தந்த தொழிற்சாலைகளின் மீது அபராதம் போட வேண்டும்.

இந்த மலரா மொட்டுக்களுக்கு எப்போது தான் நல்ல வழி பிறக்குமோ?

%d bloggers like this: